لي بغيتيه تلاقاه فالدورة ديال شي حيط ولا فوسط شي بوسطات ولا بشي نقر،” سوق الفايس” عالم يغلي بسكانه، لي غادروا الواقع لي مبقوش فاهمينو ومبقاوش باغيين صدعو راسهوم معاه..بغيتي شي مثقف شحال هادي معرفتي فينو؟ ادخل لفايس تعرف جميع اخبارو وتنقلاتو من الخليج إلى الخليج.. ألبوم متنوع وتدوينات تؤرخ الحدث مع بعض الاستثناءات ديال مثقفين كيكتبوا مرة مرة شي بوسطات من زمن المثقف العضوي لي تلف فوسط اعطيني صاكي ونايضة نايضة.
بغيتي تعرف اش واقع في العالم الآخر، نقر غير نقرة وهانت العالم كلو بين يديك بجميع الايقاعات والأجناس الصحفية لي قريناها ولي مقريناهاش، كاين العاجل والفضيحة، وكاين القنبلة، وكاين الحصري وكاين يوميات بيت نعاس، وكاين كاع النجوم لي كينشطونا في ا لسياسة وماشي السياسة، دوك لي كيكتبوا كاع المقالات وهما كيفرجونا على ديورهم الفاخرة، وأعراسهم الخليجية، ويوميات طلاقهم، ماشي هدي سياسة بنكهة مش حتغمض عينيك، والمهم هو هاد الفراجة كلها فابور، غير بنقرة اجيك العالم بين يديك، غير هو عالم متلف البوصلة ومهبط النيفو، برعاية السلطة الرابعة لي ولاو ماليها فراقي دالكورة كلا ايكيب معمن، وانت وفهامتك باش يمكن تقرا بين السطور ونساير مقالات فرشني نفرشك . وإلى كنتي من ما تبقى من شي حاجة سميتها اليسار دير شي دويرة فالفايس كايمكن تلاقى صحابك لي كيدكرونا بالراحل لينين وسي ماركس، وكيتحفونا باغاني الشيخ امام وكيعيشونا مازال فالمدينة الفاضلة لي شحال هادي زحفوا عليها صحاب كاين شي ولا لفرشي، واصحاب عذاب القبر وجمعة مباركة وغطيوا راسكوم وعقولكم. ولكن لي زوين فهاد الدويرة حدا صحاب اليسار والدين افيون الشعوب، هو يمكن وانت خارج من عندهم تزادح مع شي قصيدة شعرية زوينة ،ولا شي شابة ولا شاب دايرين شي شعارات كيحمسوا وكيحييوا فيك ديك الرغبة باش تهز شي لافتة وتخرج للواقع، غير هو ملي كتخرج كتولي ترجع تخبا وانتوما عارفين علاش. وكتبقى غير كتبوسطي فشي تصيورات من ديك الخرجة لي باين فيها غير انت وشي عشرة دارتها بيهم حتى هما شي قصيدة من يامات “مهمومة هاد الدنيا مهمومة”. ولي واعر فهاد المناضلين هو ديك التعاليق على المرأة نصف المجتمع فالفايس ولكن فالواقع كتلقى ديك نصف المجتمع لي عايش معها مغلفة، ولا ملي كيخرجلو مالين عذاب القبر كيرجع لور حيت مافيه مايزيبيخسر شي معركة خرى.الحداثيون دياونا محيحين فالفايس هادو لي معولين عليهم الجمعيات دنسا وما ادراك ما الجمعيات لي مبقينا كاع كنسمعوهم بزاف لا في العالم الواقعي ولا الافتراضي.. بايلي مودرين مابقاوا قادين على مواجهة ،غير كيتجبد صداع ديال بصح كيغبروا وملي كيكون شي صداع صغيور كيبانو ،ولكن المهم راحنا مروجين الحركة بالهدرة على المناصفة وداك الفصل 19 ديال الدستور لي سخفناه، المهم الرواج كاين فالفايس ونهار8 مارس ومن بعد الله غالب، حنا ولي جابت الوقت نشعلوا فالفايس ونطفاوا فالفايس ،ولي مهنيين دوك لي ساكنين فالفايس غير باش دبروا على شي هميزة وانتوما تفهموا، والهميزات فيهم وفيهم المهم نتا وزهرك ، وقبل ما طلع الروح كاين لي كيحط التعزية وكيتسنى يشوف شحال غدي يجمع ديال اللايكات ،وكاين لي مبرعنا في الماكل وشهيوات لي ممكن تعقد وتمرض واحد معندوش 10 دراهم فجيبو، وكاين لي ولى مراسل داءم لجميع الماسي حريق ،انتحار ،مدابزة، قتيلا ،حتى كرهنا فراسنا وشي بعض المرات كتحس بلي راك حتى انت مسؤول على كل هادشي وكتولي خايف تولي متهم بشي موتيف وانت راك غير ساكن مع لخوت فالفايس. ولكن كاين شي بنادم فالفايس لي كيعجبك مرا مرا تمشي لحيط ديالو باش تثقف وتشوف اخر تدوينة ديالو والسينا ريوهات الممكنة والغير الممكنة لي تخيطات ولي مازالا، وكيولي عاجبك لحال وانت كتشوف هاداك السيد على شاشة شي قناة كيحلل وكيفصل ويخيط وكتفرح وكتبقى تغوت واو هادا راه جاري فالفايس، غير هو ملي كيطيح الفاس فالراس كتلقى بلي داك السيد راه ماكان قاشع والو حيث كاين لي خيط واحد التفصيلة خلات جارك ماشي غير يعاود التخمام في بوسطاتو ولكن فقرايتو كاملة، وخلاتك نت تمشي تقلب على داك الموقع لي ولا فيه عادل الميلودي محلل وكترتاح من صداع الراس وكتبقا تابع شي بوز وشكون لي تزوج وشكون لي طلق واسماء المنور وهي كتغني “هو عندو لحمام فدارو”. المهم لهلا يخطي علينا الفايس كنفوجوا على روسنا وكنتلقاوا فدروبا دياولو كل واحد علاش مغزف ،كنخويوا قلوبنا، وكنتونسوا بيناتنا وكنخلقوا ابطالنا والمؤثرين بالايكات لي عاصرين معانا بتدوينات لصق ولوح المهم الايكات، غير هو ملي كنخرجوا شوي للواقع مع الناس ديال بصح ومالين التدوينات ديال بصح راع كتجينا الدوخة.. وكنبانو دايرين لعرس بلا فراجة وطبالا ولغياطا تالفلهم الايقاع، وهادشي علاش ستحلينا الجلسة فالفايس، اللهم حيوطوا لي قابلين على هبالنا ولا وإلا.. وكملوا من راسكوم بشي بوسط واعر.
سلام يا أهل الفايس طبعا وانا معاكم والله ما ساخيين بيكوم واش خاسرين كاع لي بغا يربح العام طويل، ياك عندنا سكن دائم فالفيس وبالمجان، وعندنا البوسط الجماهيري والايكات من كل البقاع ،والتاريخ لكل التحركات، واش بغينا بهاد الواقع كاع؟ ولي ماشرا يتنزه و اراك لبوسطات واللايكات.
أمينة غريب
