“دار النسا” بدا طافي باقي كاع ما شعل

بقلم: فؤاد زويريق

بسمة نسائية/ منبر بسمة

مع بداية شهر رمضان، انطلق موسم الدراما التلفزية 2024، ومعه تفاعل رواد نشطاء مواقع التواصل الاجتماعي، والعديد من النقاد والمهتمين بالشأن الفني ببلادنا.

“بسمة نسائية” ستتابع هذا العام كل ما ينشر عن الأعمال التي تقدمها كل من القناتين العموميتين الأولى والثانية، وننقلها كما وردت على صفحات أصحابها.

عن مسلسل ” دار النسا” يقول الناقد فؤاد زويريق

“تا يقول واحد المثل مغربي زوين العشا الزين تشم ريحتو من العصر، وهاد العمل اللي سميتو “دار النسا” بدا طافي باقي كاع ما شعل، الحلقة الأولى منه مخلطة أومشبكة بغاو يقولوا كولشي من الأول أوماقالو والو…”..

كثرة الخيوط والدخول فالأحداث والشخصيات دون بناء مسبق، فوضى صافي، واحد السيدة محترمة بقات فيا مسكينة  كانت مابيها ماعليها جالسة فآمان الله كأي جدة مغربية فجأة لقينها متورطة فشي قتيلة، هي براسها تشوف راسها فالمسلسل غادي تفاجأ، دخلوها مسكينة صحة فواحد الفلاش باك  أوخرجوها عاوتاني، أودخلوها فنفس القتيلة فالحاضر،  وبين الفلاش باك والحاضر ماتغير أوماتبدل والو وحنا مافاهمين والو ! وحدة خارجة من الحبس وهي ديما تتخرج من الحباسات  فالمسلسلات اللي تتمثل فيهوم فرمضان، وقفات قدام باب الحبس وبلا مقدمات ولامقبلات دخلات فالحدث سخونة بحال إلا كانت غير مورا الكاميرا تادير حركات تسخينية ماشي فالحبس وحنا مافاهمين والو ! سيناريو مرتابك من الأول، خيوط مبعثرة ومخلطة، تمثيل ضعيف الى حد الان، حتى مريم الزعيمي اللي عندها موهبة أشدت بها شخصيا فالكثير من المناسبات، باينة بحال إلا غير مقصرة مع صحاباتها، شخصيات هزلية تحاول فرض مواقف كوميدية بتعابير ارتجالية مستفزة عفى عنها الزمن،  مريم الزعيمي كمثال والمبالغة فالانفعالات والحركات بدون سبب، ومعها بنتها التكتوكر  وغيرهما  بسالة مابعدها بسالة، رؤية اخراجية مرتبكة وضعيفة، وأغلب الشخصيات في العمل مشردة وتائهة بدون تغطية مقنعة وكأنها كتبت أو تم تسكينها خارج السيناريو  ولاحول ولاقوة الا بالله، سيقول لي أحد المتفذلكين هادشي كولو بان ليك من الحلقة الأولى؟ سأجيبه وأقول له إيه أقسم بالله، زائد أن أغلب الأعمال الدرامية المغربية تتكون مفروشة من الأول بسبب ضعف الكتابة والاخراج، المهم وباختصار العمل من الخيمة خارج مايل وخارج مفدوع واللي بان ليه بأن العمل زوين ويستحق المتابعة تنتمنى ليه فرجة ممتعة وحظ سعيد.

للإشارة، “دار النسا” من اخراج سامية اقريو ويلعب فيه دور البطولة كل من نورة الصقلي ومريم الزعيمي وابتسام العروسي وياسين أحجام ، وربيع الصقلي وفاطمة الزهراء قنبوع وسعيد موفق وآخرون..