الشاعر الزجال: مصطفى العبريدي
في غرق بحر النوم
اركبت بساط امنامة
اسرى بيا في اعوالم تغري
اعوالم تجلب
اعوالم تسلب
ابقيت حيران نتگلب
عيني خيم عليها العجب
و ريقي من الكلام انضب..
***
هزني هوى فكري و داني
أرماني
اجلاني
خلاني نستحضر وقتي كيف اتغزل
و كيف اتسدى حنبل حياتي.
سرتلت مخيط سنين عمري
غرزت بيه ما فات من زماني
المخيط ايوثق لغراز
وانا..على افياقي حواز.
***
فرشت أوراقي و اضربت الفال
كربلت ما شيان من الأفعال
ما اقدرت انحكر في ما أفرز الغربال
ما اقدرت انكتر تسوال
ما اقدرت انبش على الراگد في الادخال
بحيرة العمر ساترة اهبالها
و عيب لبحيرة قالو تفتاشها
اتعري المستور بين الضلوع
و اتفرق الأغصان على الفروع.
***
وجدت لقلم و الدواية
بالمداد..غازلت جنود لعناية
بحت لهم بشكايا
و منيت نفسي ايذوقو لغايا
زاوگت في اجوادي
ايشوفو من حالي..ايگعدو اوسادي
ايروفو عليا بشوية ديال العطفة و المحبة
ياك قالو لمحبة بنت الرضى..حتى حد ما اخطاتو
غير كل واحد و كيف جاتو.
***
زاوگت في اسلاطن املوكي
المتربعة على ارسامي
اتخلخل اعلامي
تسمى بمقامي
تطلق سراح لساني
اتزعزع لقلام..ينقش بالحروف كلام
احلاوتو امدام
امذاقو عسل
ارزانتو اكبل
امضاوتو انصل..
لون سدى لعمر غماز
فصلت من خيوطو سلهام باز
منقارو امشكل مهماز
ابسطت جناحي و طرت في العلى
هارب من مذلة
انراوغ أهوال الحملة
انفرغ من الأحزان شلا.
***
حركت جمر الكانون..طعمتو بمشموم بخور
اتزينت باللوبان..اتريحت بعطور
اتخشعت..برگمت..عزمت..
بئر لملوك ما لقيت فيه دلو
ما اقدرت نعرف ماه مالح ولا حلو.
***
طرطق لوثاق..طلعت صرخة من الأعماق
صرخة محگور..بلسان دامي و جناح مكسور
من جوف قلب معگور
عگراتو الأيام..حتى اورام
عگروه الناس..حتى فاض الكاس
عگراتو داتو..اتخبى في برجها ما احماتو.
***
حاولت اندقق الشوف
و الشوف ما برد الحامي فالجوف
حاولت نتمعن..نتمكن
راسي ما اوزن و قلبي ما افطن
حديد فكري بالشك اتصدى
ما ابقيت اعرفت باش نبدا
واش انطل في البارح..ولا انشوف غدا.
***
ضحيت و ضحيت
قلت..هادا قدري
شحال غامرت بلا ما ندري
شحال بعت بلا ما نشري
و شحال اندبت حظ زهري.
***
حاولت نفهم علاش
خدمت عقلي نباش
لقيت راسي..اموسد احناش
من وقتاش و كيفاش
أي جواب بالمراد ما اوفاش.
***
لجمت فمي..درت لكمامة
شمعت عقلي..طلقت لفهامة
طريدة تايهة في دروب دوامة
عينيها اتعامى و رجليها اترامى
ما نفعتها زعامة..ما احماتها شهامة.
***
حليت عيني خير و سلام..اطلعت من لقراب
ارجعت أنا..انفضت التراب
ضربت خماسي فسداسي
أخرج لي نفس الحساب
دربالة الصواب..عوضها قفطان العذاب
الشافي من الجواب..غلفاتو غمامة السراب
سالف الرزانة..ابياض شعرو و شاب
حمامة الحكمة..غرها لسان غراب لحلاح كذاب
و كلمة الحق..شاة..گوادها ديب بنيابو وثاب
***
هكذا هي حكاية سنين عمري في هاد الزمان
كنت انظن راسي في السفينة قبطان
كنت انظن راسي حاكم لعنان
كنت انظن صباغة روحي..اتخضر الأوراق في الأغصان
الساعة لقيت..اللي كان كان
دهستني الحملة..و ابلعني الطوفان
اوعيت باللي كنت و مازال قربان
قربان..كيلاعب فم ثعبان..اسلاحو عصيان
ايجيك بالبهتان في صفة برهان
ما اتقهرو صلابة فرسان
والا ايرهبو سيف المتمرسين الشجعان.
