مراكش/ بسمة نسائية / عزيزة حلاق
الصور: بعدسة المبدعة زليخة
اسمها سعيدة موح، امرأة مغربية أصيلة، عاشت في الظل ككل النساء البسيطات والمكافحات، لم تكن تعرف الأضواء والشهرة، إلى أن سطع نجم ابنها في سماء كرة القدم. كانت ضيفة مميزة ضمن ضيفات المؤتمر الدولي الثاني بمراكش والذي جمع قيادات نسائية من إفريقيا والعالم العربي. وحضيت بتكريم خاص من قبل رئيسة المؤتمر السيدة أنيسة النقراشي، وصفق لها جميع من حضر إلى هذا الملتقى الدولي..كانت بحق نجمة هذا اللقاء النسائي، يتهافت الجميع للحديث معها أو لأخذ صورة برفقتها..
هي والدة نجم كرة القدم الدولي المغربي أشرف حكيمي، هاجرت إلى اسبانيا رفقة زوجها في سن مبكر. كان ذلك سنة 1988.عملت كمنظفة في البيوت، ولا تخجل من قول ذلك، بل تفتخر بأنها رغم ضيق الحال، كافحت هي وزوجها باستماتة من أجل تربية أطفالها الثلاث، نبيل وأشرف ووداد.
كان هاجسها في الحياة، تربيهم على قيم ومبادئ التي تربت عليها في بلدها المغرب، و توفر لهم رفقة والدهم كل احتياجاتهم. لم ترفض لهم طلبا، وحين أعرب أشرف وقبله شقيقه نبيل على ممارسة كرة القدم، استجابت لرغبتهما.
تقول إن موهبة أشرف ظهرت في سن مبكر مابين 4 و5 سنوات، حين كان يلعب رفقة أقرانه في الحي حيث كانوا يسكنون. وانتبه منذ البداية، إلى هذه الموهبة الفذة نادي ريال مدريد. فتبنوه وعرفوا كيف يستثمرون موهبته.
بدأ مشواره مع الكرة في أكاديمية “لافبريكا” التابعة لنادي ريال مدريد، وها هو اليوم نجم عالمي يعتبر أفضل ظهير أيمن في العالم، ومن بين الثلاث الأسرع دوليا، والأغلى عربيا بعد التحاقه بباري سانجرمان…
– سألنا سعيدة موح هل كانت تتصور أن يصل ابنها أشرف إلى ما وصل إليه من شهرة ونجومية وغنى؟ فابتسمت بطيبة وعفوية وبلهجتنا المغربية وقالت :
* لا…والو ….ما كنتش كنتصور ولا حتى نتخيل غادي جي يوم ويصبح ولدي مشهور ومعروف بزاف فالعالم…
– لمن كان الفضل في أن يشتهر أشرف ويصل إلى هذا المستوى؟
* الفضل لله أولا، ولموهبته التي ظهرت وعمره لا يتجاوز خمس سنوات، ولنادي ريال مدريد الذي اكتشفه وهو صغير يلعب مع أقرانه في فريق الحي…
– بالنسبة لك ولوالده هل كنتما تشجعونه على ممارسة هوايته يعني الكرة أم كنتما تحثانه على الدراسة أولا؟
بمعنى واش كنت تقولين له قرا وخلي عليك الكرة؟
* الصراحة ريال مديد احتضنوه وهو صغير، كان عندو 6 سنوات وكان ضروري يجهد فالدراسة ويلعب الكورة في نفس الوقت..
فالأول كان أشرف ( فمدرسة ديال المخزن) و( تعني في مدرسة عمومية مجانية)، من بعد منين بدا كيدرب كل صباح بدا كيتابع الدراسة بالقلوس؟
– هل كانت لديك الإمكانيات المادية لتغطية مصاريف دراسته؟
*الصراحة هو قرا راسو بيدو، حيث كان ريال مدريد كيعطيوه شي باركة، وكان كيخلص قرايتو، ودارو معاه كونطرا وهو عمرو 6. بدا بكونطرا من 6 إلى 7 سنين، واستمر معاهم كيجددوا لكونطرا ديالو كل سنة حتى وصل 18 العام.
– ومن بعد فين مشى؟
*منين وصل 18 سنة، أصبح ريال مدريد كيسلفوه لدول أخرى.. مشى من بعد فالأول لعب مع ألمانيا و مراها مشى لايطاليا.، بقى فيها شي سنة، ورجع لمدريد. هنا وقع شي حاجة ما تفهموش معاه، ورجع لايطاليا ومن بعد مشى لفرنسا، وباقي فيها حتى لدابا. مشى كيلعب مع باري سانجرمان…
ومنين وقع الكونطرا مع فرنسا كنت معا راه كاينة الصورة…
**أشرف حكيمي برفقة والدته وشقيقته عقب التوقيع على عقد 60 مليون أورو.. ليصبح الأغلى عربيا بعد التحاقه بباريس سان جيرمان..
– كم سنه اليوم؟
*أشرف عندو دابا 23 سنة…
يبدو أنه تزوج صغير، شحال عندو ديال دراري؟
– هو بغا يتزوج قلنا لو الله يكمل بخير.ومراتو ظريفة هي مزيودة حتى هي باسبانيا ولكن والديها عرب بحالنا، باها ليبي وأمها تونسية…وعندو جوج وليدات أمين ونعيم.
** (بحركة تلقائية أخذت هاتفها، وبحثت عن صور حفيديها، و قالت بمحبة طاغية وفخر واعتزاز):
* ها وليداتو شوفي شحال زونين، ولكن اسمحي لي ما يمكنش لوليدات الصغار يبانو فالصحافة ..) ..
– الله يخليهم ليكم…ويخليك ليهم…..هما الكبدة المعاودة بحال اللي كنقولو..
*تبتسم، بصاح هي هاديك..
– بالنسبة لعلاقتو مع المغرب؟
*هو راه منينن كان عندو 12 العام وهو كيلعب مع المغرب، وكيبغي بلادو بزاف ..
و دابا كيوجد باش يكون مع المنتخب المغربي فمونديال قطر…
واخا كيلعب ففرنسا منين كيعيط عليه المغرب للتداريب كيجي.. كيجي..هو وكاع اللاعببين المغاربة اللي كيلعبو فالخارج..وراه قريب يلعبو فبرشلونة ماتش حبي استعدادا للمونديال..
– شنو شعورك وانت كتشوفي المكانة اللي وصل ليها اشرف ولدك، واش كتبعي كل المباريات اللي كلعب فيها؟
* تبتسم، كنكون مفتخرة به وفرحانة، وكنكون مخلوعة عليه شوية من شي إصابة، الصراحة كنتبع الماتشات كاملين ولك كنكون فحالة فشكل منين كيكون لاعب مع المغرب..كنكون على أعصابي متوثرة والله العظيم..
– كلمة للمنتخب المغربي وهم مقبلين على مونديال كأس العالم بقطر؟
* خصنا كلنا ندعيوا معاهم، الله ينصرهم باش يفرحوا ويفرحوا معاهم المغاربة كاملين..
* إلا سولناك عن أشرف دابا منين أصبح مشهور كيفاش كيتعامل معاكم ومع الناس، واش تبدل منين ولا مشهور وغني؟
– أشرف متغيرش، باقي هو بحال اللي كان، ظريف ودرويش، وكيعاون الناس كلها، واللي احتاجوا ولا طلب منو شي حاجة ما يقولش لا..اللي بالامكان ديالو كيديرو..الله يرضي عليه..
* دابا غادي نسولك أنت…كنظن أصبحتي معروفة حتى أنت وتشهرتي ..كيفاش كيتعاملوا معاك جيرانك وحبابك…
– تبتسم، أنا حتى فالحومة دالي ..ماكان حتى حد كيعرفني، حتى بنت فالتلفزيون فاسبانيا فواحد البرنامج داروه ريال مدريد على حياة أشرف وكيفاش عاش معانا..كان الى تفكرت فشهر 12 فعام 2017 ، وكانت القناة “تلي مادريد”.( تضحك) فالصباح منين خرجت، الجيران كلهم جاوا كيسلموا علي وعاد عرفوني بأنني مامات أشرف…ودابا تعرفت كثر، منين بدا كيديني معاه فبعض المناسبات…
– كيفاش حستي وأنت تكرمين هنا في مراكش في مؤتمر نسائي دولي، والكل كيجي يطلب ياخذ معاك صورة؟
* ( تضحك) تفاجأت وعجبني الحال وعجبوني الناس كبروا بي وبغاوا يتصوروا معايا، منهم مغربيات وعربيات وافريقيات..
– لاحظنا انك انت اللي كتكوني معاه بزاف ماشي باباه..علاش؟
* غير حيث باباه مكيبغيش يبان بزاف ومشغول فخدمتو..
* واش عندكوم العائلة هنا فالمغرب..
– عندنا العائلة فالمدينة ديالي، أنا من الشمال من القصر الكبير وباه من وادزم عمالة اخريبكة..ومنين كنجيوا للمغرب كنمشيوا عندهم..
– واش تغيرات حياتكم والمعيشة ديالكم من بعد ما تحسن المستوى المادي ديالكم…
– تضحك، عادي ما تغيرتاش شي حاجة بزاف، داكشي ديال المظاهر تغير شوية ولكن القلب هو هو ما تغيرات حتى حاجة…
* أشنو النصيحة اللي كتقدميها لولدك أشرف ولولاداتك كاملين، نبيل ووداد؟
– انا ديما كنقولهم يكونوا يد وحدة ويبقاوا محانين بيناتهم، ويكونوا القفل والساروت لبعضياتهم وما يخليوا حتى حد يدخل بيناتهم وأشرف كنوصيه يبقى حنين مع كلشي و متواضع وما يتغيرش وما يتغرش بالشهرة ويبقا محافظ على أصلو..ويبقى راسو صغير. ونتموا كتشوفوا منين كيلعب راسو محدور منين كيهضر كيحشم..هو كيحشم أكثر مني…حتى الهضرة ماكتبخيش تخرج لو..
والصراحة، هو ظريف ومرضي ومحبوب من الجميع وخدوم وما كيرد حتى شي واحد احتاجو…و كيعجبني الحال وكنفرح منين كنشوف المغاربة كيبغيوه ، دابا هو راه ولد المغاربة كاملين…
